祖國首都(三)

第六日(2 Jan 2006)

呢日起身去左一個叫798既地方, 以前係工廠區, 宜家集合數十藝廊既文化藝術區~
睇左幾個gallery, 我當然唔係好識睇啦, 只可以話有o的野都幾靚咁lor~
我特別有印象既係一間放舊相既gallery, 好似叫 "百年中國", 主要展出既都係一o的上個世紀既相, 當中"毛主席" 既就佔左場內展品既大多數.不過我最深刻都係一o的戰爭場面既影集~
晚餐就食過番尋味, 去番之前o固晚同一間"同利園", 四條友食左七個餸....飽到癲!!
食飽就去火車站踏上平遙之旅, 呢程係卧鋪, 當然係爽啦, 四條友都熟睡, 十一個鐘車程, 話咁快就到~


第七日(3 Jan 2006) @ 山西平遙古城

訓醒就差唔多到站, 落車拿拿聲買回程火車飛, 但係得番企位!!!!!!十一個鐘點企!?
我地當然冇理佢住, 又諗住問旅店有冇計啦~~
跟住就坐o的面包車入城, 入到城個感覺好好, 成街都係尖瓦頂磚屋, 仲要冇乜現代既修飾, 即刻覺得自己拍緊古裝片~~
一路去揀旅館, 間間都有好完整既四合院, 果然保存得好好, 結果揀左一間可以俾我地包起兩既正房既, 叫"西裕成" , $120 一晚, ok 咁啦~
食完個早餐+午餐就去左踩單車去下城外, 又遊下城內, 每一處我地黎講都好新奇~
去左一個鏢局博物館, 我本來都唔知究竟咩係鏢局, 睇左就知原來係黑社會既始祖, 佢地既服務係包括"睇場", 私人保鑣...等等.
天色慢慢變黑, 呢個時候, 我地期待已久既事黎喇!! 就係雪呀~~ 仲要越落越大, 好開心~~~
番到旅館, 就知道火車飛已經買到喇, 不過係硬座... 聽日就知味道!!!



第八日(4 Jan 2006) @ 山西平遙古城
起身出門口, 眼前既雪景實在令我太高興~所有野都鋪住一層寸幾兩寸厚既白雪, 係我第一次親身經歷既雪景~~
食完早餐就梗係速趕上城牆, 個景實在殺死人~~~係呢個情況下, 我地決定o係呢個城牆上面行大半個圈, 睇睇成個城唔同角度既景色, 一行就行左兩三粒鐘~~不過都係值得既~~
之後諗住包車去附近既雙林寺, 明明係六點收到, 我地五點到, o固條管理員竟然同我地講話天氣涷, 所以早o的收工, 叫我地第二日請早!!! 吹到啤晒~~~
跟住見到附近中學有班o靚仔o係度玩雪球, 諗住埋去八下, 點知冇耐就俾人圍攻~~~結果我就當然係中左招, 俾佢地o的雪球掟中啦~~~不過其實都幾好玩既^.^y
跟住係旅館呆左一段時間就去火車站, 天氣開始越黎越涷, 仲要座冇乜空調既硬座廂, 認真大獲, 不過最值就係見到祖國同胞門既睡姿大匯演啦~ 打橫, 打直, 橫跨走廊, 仲有o的係不能以文字型容~~總之就係各色其色啦~~~