死有何難， 捨難取易

吳攻越, 越軍被擊潰, 在越王勾踐意圖於城樓自刎以保名節之制,
范蠡喝道: "死有何難, 大王, 你是捨難取易呀"
一句話, 我呆住了.

由大概個多月前開始在電視廣告上見到"爭霸"的宣傳片子, 已經十分之期待, 可能"墨攻"吊起左條春秋戰國癮, 唔夠喉, 電視劇都照殺. 睇左兩集, 覺得片拍得唔錯, 有水準.

故事裏面, 范蠡講左以上那一句話, 我覺得十分之有意思. 好有共嗚.
做人處世, 會有好多目標, 有時候在實踐目標的既中途, 問題出現, 進度走下坡, 就會有放棄的念頭,

讀書唔好, 不如不讀
做事唔順利, 不如不做
打機打唔爆, 不如不打
更甚者做人不爽, 不如不做..

這些種種表現, 好比勾踐既"死", 皇上做不好, 不如不做, 甚至人也不做了..
范蠡一語道破, "死" 又有何難呢? 一"死"了之, 置後果於不顧, 實在是捨難取易的表現.
我們常常都會掛口邊 "大不了咪xyz" , 那xyz參數, 其實就是心裏以為是為事件負上全責的了結, "大不了咪唔撈", 就覺得自己完成了作為打工仔的責任, "大不了咪唔收錢", 就以為自己對得起客戶, 所有事馬上變得没甚麼"大不了".

一句"實在係捨難取易", 我恍然大悟, 原來這些是把事件完結的最快方法, 可惜並非能夠解決問題的方法, 要解決問題, 比放棄它難不知多少倍, 以後當再次遇上要困難的時候, 希望可以欣然面對, 就算真的要放棄, 也不要為這個失敗冠以一句冠冕堂皇的藉口了.