Honglun -> Let's get together: April 2006

啟發~Mad Mike and Mark

今日睇到有線animal planet 一個節目, 講兩個人 mike and mark, 佢地一個係photographer, 另一個係camera man, 節目叫做 “Mad Mike and Mark.

個節目真係mad, 內容係講佢地點樣深入野生動物既世界, 拍底佢地一舉一動, 生活細節等等~ 重要既係, 佢地為左拍底呢o的細節, 真係不惜一切, 而呢個所謂一切, 係包括佢地自己既性命~~ 佢地可以o係只有2米既距離之下, 拍攝4,5頭獅子正在捕食一隻斑馬既情況, 仲要隻獅子已經o係度 ”怒bear”佢, 佢都仲拍多幾十秒先走, 講真, 我都係第一次睇呢o的節目睇到驚驚地~ 呢個只係例子, 佢地做呢o的危險動作唔只一次, 咩大象, 老虎, 豹, 唔惡既佢都唔拍~ 大家有 cable 既不妨得閒睇下 (不過我唔sure 幾時播… =.=b, 我睇既時候係 sat 13:00 咁上下, animal planet)

但係點解我會想講佢地呢, 其實因為我睇既時候就o係度諗, 呢o的咪就叫做為理想而冒險lor, 我會諗, 佢地真係為左想做既野, 選擇行條有險既路, 失敗既結果可以係重傷或賠上生命, 但係成功既話, 換黎既除左佢地既節目收得之外, 我相信更重要係佢地對自己既肯定, 令到自己更有信心向前行, 拍更多呢o的珍貴既片段. 當然, 隨住佢地一路試驗, 自己對大自然既認識會更多, 危險自然會減少, 亦都步向一個穩定既方向, 造就呢個節目既成功~

呢種勇氣, 呢種冒險精神, 實在好值得我去學習.

老生常談 - 理想與前途

早陣子因為工作上既一件事, 令到我開始思考理想與前途之間既取捨問題, 以往一向以為兩者並無矛盾, 可以共存, 不過現實話俾我知, 佢地有時會迫你作出取捨, 個感覺就好似有人問你 “你阿媽同老婆一齊浸親叫救命, 你會救邊個先?” 一樣. 選擇任何一方都可能令你失去左一o的好寶貴既野.

以前會諗, 我既理想係可以”順手” 帶俾我美好既將來, 充裕既生活~ 係o岩既, 不過我冇諗過風險既問題, 萬一個實現唔到個理想咁點呢? 到時我可能已經投資左我大半生時間架喇~~

原來發夢真係學生既專利, 自己o係社會工作時間越長, 人就越多現實既顧慮, 除左要顧自己, 仲要諗埋屋企, 諗自己第時個屋企, 呢o的野部都o係度同我講 : “咪發夢啦你~~”

仲有既係, 自己有時都會俾眼前利益所動搖, 諗下如果有份人工高o的既工, 就可以滿足到自己更多既物質欲望 (**睇下面個list 都知啦=.=). 再諗下, 宜家放棄眼前大好前景, 走去o的細公司度博一鋪, 第時未必番到轉頭, 諗下諗下, 就會覺得自己想放底理想, 不如疊埋心水打份好工, 等自己第時生活有保障o的啦~~

所以我其實都幾覺自己係一個短視既人.

不過點都好, 我呢一刻年紀都未大, 仲可以博埋呢次既, 可況o固條 ”前途”既康莊大道又未明朗, 到佢真係殺埋身先再算啦~

好多錢洗..

哈, 以下係本人近兩三個月有興趣帶番屋企既野:

Dell 24" Widescreen LCD
HKD$ 6,599

Apple Mac Book Pro
HKD$ 19,999

HP Pavilion dv 1603TN
~HKD$ 15,XXX

Nikkon D50 DSLR Kit
~HKD $ 5,XXX UP....

XBox 360
~HKD $3,XXX

IPod Video 60GB
HKD $ 3,200

寫得出既加埋已經幾皮野...仲未止....

有日去旺角某某商廈, 原本只係換信用咭禮品, 點知側邊有間賣hi-fi 既鋪頭, 未到門口已經俾入面既聲音吸引住, o係幾次既打量之後, 終於都入左去~ 哈, 原來係無間道~~~ 膽機!! 呢樣野以前聽朋友講過, 但係一直都覺得自己耳仔唔靈光, 分唔到hi-fi 既quality, o固陣我會話 "我都聽唔出分別", 不過呢下真係開竅, 咩叫做實在既聲音, 馬上明白, 咩叫做人聲浮出黎, 完全清楚....不過, 宜家好擔心, 如果要將呢個item 加埋o係上高個list 度, 我恐怕個數會變成天文數字~~

你以為咁就算, 仲未呀!!加埋一架車仔就差唔多喇~~

Peugeot 206
Mitsubishi Galant VRM
Lexus IS250

整完個list, 自己都呆左..
就好似我同我個friend 成日講:

"唉...我地真係好多錢(要)洗"

哈, 夢係總要發下既~比心機做野啦!!